Turmush — Нарын облустук ички иштер башкармалыгынын жетекчилиги Ат-Башы районунун тургундары менен жолугушту.
Облустук милициянын басма сөз кызматы билдиргендей, иш-чара президент Садыр Жапаровдун жарандардын кайрылууларын сапаттуу жана өз убагында карап чыгуу боюнча көрсөтмөсүн ишке ашыруу жана ички иштер министри, милициянын генерал-полковниги Улан Ниязбековдун тапшырмасына ылайык өткөрүлдү. Жолугушууга Нарын ОИИБдин башчысы Жолболду Кочконов, Ат-Башы райондук администрациясынын башчысы — аким Мухтар Шербаев , Ат-Башы районунун прокурору Кубанычбек Нуруллаев катышты.
Жолболду Кочконов Ат-Башы РИИБдин имаратында капиталдык оңдоо иштери жүргүзүлүп, кызматкерлер үчүн заманбап үлгүдөгү спорттук зал салынып жаткандыгын билдирди. Мындан сырткары айыл аймактарга милициянын аймактык бөлүмчөлөрү бардык шарттары менен пайдаланууга берилип, жаңы автоунаалар менен камсыз болду.
Жолугушууга келген жарандар бир катар маселелерди көтөрдү.
- Бишкек—Нарын—Торугарт жолунда мал-жандыктар катышкан жол кырсыктары;
- сол рулдуу унаалардын техникалык кароосу;
- борбордук базарда тыгындар жаралып жаткандыгы, айылдан келген автоунааларга атайын токтотуу жайдын жоктугу;
- жол коопсуздугун алдын алуу боюнча жолдо жол эрежелерин сактоо боюнча түшүндүрүү иштерин күчөтүү;
- аралыкты сактап айдоо боюнча ички көчөлөрдө токтотуу эрежелерин киргизүү;
- мектеп окуучуларынын коопсуздугу, тартип бузган окуучуларга атайын мектеп, окуучулар үчүн машыгуу залын ачуу, бош убактыларын туура пайдалануу боюнча кызыктыруучу ийирим;
- үй-бүлөлүк зордук зомбулук көрсөткөн жарандарга тартипти күчөтүү.