Turmush — Жалал-Абад облусунун Манас шаарында алимент төлөбөгөн жаран сот залынан 2 жылга камакка алынды. Бул тууралуу Манас шаардык сот аткаруучулар кызмат бөлүмүнүн улук сот аткаруучусу Улукбек Ташболотов билдирди.
Анын айтымында, Манас шаардык сотунун 2022-жылдын 8-апрелиндеги чечиминин негизинде карызкор — 39 жаштагы Т.Ш.А.дан өндүрүп алуучу К.Ш.Анын пайдасына 2018-жылдын 18-апрелинен тартып кирешесинин жарымы өлчөмүндө алимент өндүрүү боюнча аткаруу барагы Манас шаардык сот аткаруучулар кызмат бөлүмү тарабынан аткарууга алынган.
Аткаруу иштеринин жүрүшүндө карызкор 2025-жылдын март айына чейин алимент төлөбөй, карызы 700 миң сомго жеткени аныкталган. Мындан улам сот аткаруучулар тарабынан Кылмыш-жаза кодексинин 178-беренеси (ата-эненин балдарды багуудан качуусу) боюнча кылмыш ишин козгоо тууралуу сунуш жөнөтүлгөн. Натыйжада 2025-жылдын 27-ноябрында Манас шаардык соту Т.Ш.Ага карата 1 жылдык мөөнөткө пробациялык көзөмөл колдонуу тууралуу өкүм чыгарган.
«Бирок Жалал-Абад облустук сотунун кылмыш-жаза иштери боюнча соттук коллегиясы 2026-жылдын 26-февралында бул өкүмдү өзгөртүп, айыпталуучу карата бөгөт коюу чарасын күчөтүп, ал сот залынан 2 жылдык мөөнөткө дароо камакка алынды», - деди Улукбек Ташболотов.