Turmush — «Мекендештер» рубрикасынын кезектеги каарманы — Баткен облусунун Кадамжай шаарына караштуу Орозбеков (Охна) айылынын тургуну Абдулазизова Милена Жумабаевна. Ал бала чагынан эле максат коюп, өз күчү жана эмгеги менен Москвада билим алып, эки кесип — юрист жана борт коштоочу багытында ийгиликке жеткен. Азыркы учурда ал авиация тармагында эл аралык деңгээлде өнүгүүнү, жаңы тилдерди үйрөнүүнү жана дүйнөнү кыдырууну максат кылып жатканын Turmush басылмасына айтып берди.
Баткенден Москвага карай жол
Мен 2002-жылы 2-январда Орозбеков айылында жарыкка келгем. Үй-бүлөдө эки бир тууганбыз — агам бар. 8-класска чейин ошол эле айылдагы мектеп-гимназияда окуп, 2016-жылы апамдын жанына Москва шаарына көчүп келдим. Мени таенем менен апам чоңойтту, атам менен баарлашпайм. 2004-жылы апам Москвага мигрант болуп келип, ошол убактан бери ушул жакта ашпозчу болуп иштеп калган.
Россияда күн кечирүү орус тилин терең үйрөнүп, жергиликтүү маданият, тарыхы менен таанышууга түрткү болду. Чынын айтсам, алыскы аймактагы кыргыз мектепте билим алып, орус тилин жакшы билчү эмесмин. Москва шаарындагы №507 лицейге кирип жатканда, Кыргызстан менен Россиянын окуу программасы ар кандай болгонуна байланыштуу 8-класста эки жолу билим алууга туура келди. Дал меникиндей кырдаалга Украинадан келген кыз дагы туш болгон. Ошентип, экөөбүз чогуу жүрүп окудук.
Алгач орус тилиндеги сөздөргө басымды (ударение) туура койбой же орус тилинин грамматикасындагы сөздөрдөн жаңылганда (женский р., мужской р., средний р., – ред.) күлүшчү. Апам мага китептерди алып келип, көчөдөн гезиттерди көрсө да окута берчү. Натыйжада мен орус тилин өздөштүрүп кеттим.
Бирдиктүү мамлекеттик экзаменди (ЕГЭ) жакшы тапшырып, 9-классты ийгиликтүү аяктадым. Андан кийин 10–11-класска өттүм. Орустар үчүн да бирдиктүү мамлекеттик экзаменден өтүү кыйын болчу. Айрыкча математика сабагынан көптөр кулап, кайра тапшырып жүрүшчү. Менин апам математика мугалими болгондуктан, мага бул сабак оңой эле тийди. Ал үйдө мага түшүндүрүп, жакшы окутуп турчу, ошондуктан мен бул предметти 4–5 деген бааларга окучумун.
Москвадагы жогорку окуу жайга өтүү
Кыргызстанда жалпы республикалык тестирлөө болсо, Росияда бирдиктүү мамлекеттик экзамен. Мен ЖРТ тапшырган эмесмин, бирок экөө окшош эле болсо керек деп ойлойм. Кошумча предмет катары тарых сабагын тандагам. Мугалимим: «тапшырба, сен 8-класстан баштап Россиянын тарых сабагын окудуң, ага чейинкисин билбейсиң» деп көп айтчу. Бирок мен өжөрлүк кылып, баары бир тапшыргам жана экзаменден өтүп кеттим. Ошондо мугалимим да сүйүнүп калган.
С.Ю.Витте атындагы Москва университетинин юридика факультетине (жарандык укук кафедрасы) өтүү үчүн орус тили, математика, тарых жана коом таануу сабактарынан экзамен тапшыргам. Бюджетке өтүү кыйын болгондуктан, мен жеңилдик (скидка) менен окудум.
Кыргызстандан келген студенттердин арасында бюджеттик негизде окугандар да бар болчу. Алар Кыргызстандын жарандары болгондуктан, өзүнчө квота боюнча кабыл алынышчу. Көптөгөн студенттер Кыргызстандан бул жакка 1–2 семестрге келишет. Мен да бир семестрге Бишкектеги Эл аралык "Ала-Тоо" университетине барып, программа аркылуу акысыз окуп келгем. Азыркы учурда дагы студентмин, билимимди өркүндөтүү үчүн магистратурага тапшыргам.
Билимим текке кетпесин деп, өз адистигим боюнча иштегем. Москвадагы дээрлик бардык соттордо болгонмун десем болот. Университетте окуп жүргөндө соттордо котормочу болуп иштегем. Арбитраждык жана Бутырский сотторунда практикадан өткөм. Андан кийин миграциялык укук тармагында Гүлиза Акматсияева менен бирге иштешкем.
Борт коштоочу жумушу жөнүндө
Бүгүнкү күндө «Аэрофлот — Россия авиалиниялары» мамлекеттик-жеке авиакомпаниясында борт коштоочу болуп иштейм. Бул жерде негизинен Россиянын же Беларусиянын жарандары гана иштей алышат. «Аэрофлотто» борт коштоочулар 7 жыл иштегенден кийин пенсияга чыгуу укугуна ээ жана мамлекеттик компания болгондуктан, аларга жыл сайын 70 күндүк акы төлөнүүчү өргүү берилет. Ал эми Кыргызстандын жарандары «Аэрофлоттун» туунду компаниясы болгон «Победа» авиакомпаниясында иштей алышат.
«Аэрофлотто» кадимки борт коштоочу болуп иштеген кыз-жигиттер абдан көп. Алардын арасында Жалал-Абаддан, Ысык-Көлдөн, Чүйдөн келгендер бар. Кадамжай районунан эле 4 кыз иштейт. Балким, мен тааныбаган дагы көп кыргыздар бардыр. Компанияда жалпы 7 миңден ашуун борт коштоочу эмгектенет. Биз бир рейсте чогуу иштесек да, көп учурда бири-бирибизди экинчи жолу көрбөйбүз.
Бул кесипке менин эжем жана апам түрткү беришкен. 6–7-класста окуп жүргөндө эжем мага «стюардесса болсоң жакшы болот» деп айткан, бирок ал убакта окууга көбүрөөк көңүл буруп, бул тууралуу олуттуу ойлонгон эмесмин.
3-курста Кыргызстанга «Exchange» программасы аркылуу Эл аралык «Ала-Тоо» кайтып келе жатканда аэропортто көргөн таасирлеримден кийин бул кесипке болгон кызыгуум артты.
2023-жылдын ноябрь айында маектешүүгө бардым. Андан кийин бир айдын ичинде медициналык текшерүүдөн өтүп, керектүү документтерди топтодум. Үч ай бою «Аэрофлоттун» окуу борборунда билим алып, 2024-жылдын апрель айынан тартып учуп баштадым.
Жумуш учурундагы кызыктуу окуялар
Алгач билбеген нерселер абдан көп эле, учактын ичинде өтө көп нерселер камтылыптыр. Ар бир иш өз орду менен жазылып, так жүргүзүлөт. Эшикти ачып-жабуу, өрттү өчүрүү, медициналык жардам көрсөтүү, сервис боюнча диалогдор — ушунун баарын 3 айдын ичинде жаттап, практикада колдонуп иштей баштоо бир аз кыйын болду.
Бирок чогуу иштегендердин жардамы менен тез эле көнүп кеттим. Биз ишти жаңы баштаганда ар бир борт коштоочуга устат (наставник) дайындалат. Алгачкы беш рейсте ошол устаттар менен чогуу учасың, алар сага көрсөтүп, колдоп, керектүү нерселерди үйрөтүп турушат.
Ар бир учуу мен үчүн жөн гана жумуш эмес — бул мүмкүнчүлүк. Мүмкүнчүлүк — жаңы адамдарды жолуктуруу, жаңы окуяларды көрүү жана өзүмдү өнүктүрүү. Бир жолу жүргүнчү мага: «Сен дайыма жылмайып турасың, чарчабайсыңбы?» деп сураган. Мен ага: «Жылмайган сайын чарчоо кетет, анткени мен сүйгөн ишимди кылып жатам» деп жооп бергем.
Авиация менен юридиканы айкалыштыруу
Мен үчүн авиация — бул эркиндик менен тартиптин айкалышы. Ар бир рейс — өзүнчө окуя, ар бир жүргүнчү — өзүнчө дүйнө. Мындай иш сени күн сайын жаңы нерсеге үйрөтөт, жоопкерчиликти, сабырдуулукту жана позитивдүү мамилени бекемдейт.
Жумуш учурунда күлкүлүү учурлар да көп болот. Бир жолу Алматыга учканда абдан кызыктуу окуя болгон. Ал кезде досторум менин кайсы рейсте экенимди билишчү эмес. Көрсө, менин досум жүргүнчү болуп ошол учакка түшүптүр. Мен жүргүнчүлөрдү санап жатканда саламдашсам, ал мени тиктеп эле карап отурат — тааныбай калды көрүнөт. Учак учкандан кийин анын жанына барып, «саламатсызбы» десем, досум таанып, таң калып, каткырып күлүп калган.
Менин эң чоң ийгилигим — эки таптакыр башка, бирок бирдей жоопкерчиликтүү чөйрөдө өз ордумду табуу болду. Мен укук таануучу катары сот системасында иштеп, сабырдуулук, тактык жана жоопкерчилик сыяктуу сапаттарды өздөштүрдүм. Ал эми авиация мага адамдар менен баарлашууну, дүйнөгө кеңири көз караш менен караганды жана ар кандай кырдаалда позитивди сактоону үйрөттү. Азыр мен адамдар менен иштөөдө да, ар кандай кырдаалда туура чечим кабыл алууда да өзүмдү ишенимдүү сезем.
Алдыга койгон ой-максаттар
Мен кыргыз, орус жана англис тилдеринде эркин сүйлөйм. Учурда кытай, араб жана башка тилдерди үйрөнүүгө кызыгып жатам.
Аба аркылуу көптөгөн өлкөлөрдү кыдырдым — Кытай, Түркия, Египет, Таиланд, Коломбо жана башка мамлекеттерде болдум. Ошондой эле Россиянын дээрлик бардык бурчтарын кыдырдым. Россия Федерациясы — абдан кооз өлкө. Камчатка, Алыскы Чыгыш, Сахалин сыяктуу жерлерди көрүү ар бир адамга сунуштайт элем. Бул сапарлар мага ар түрдүү маданияттарды таанып-билүүгө жардам берди.
Бош убактымда китеп окуганды, тил үйрөнгөндү жана спорт менен машыкканды жакшы көрөм. Акыркы учурда блог тартуу үстүндө иштеп жатам.