Бөлүмдөр
Дүйшөмбү, 17-февраль
Жалал-Абад облусуЖалал-Абад 05.02.2020 18:45 На русском

Коронавирус: Жалал-Абадга келген Кытайдын 10 жаранын унаадан түшүрбөй, кайра артка жөнөтүштү

// Turmush

Turmush -  Тогуз-Торо районундагы «Макмал Голд Компани» ишканасына келген Кытай Эл Республикасынын 10 жараны Бишкек шаарындагы республикалык жугуштуу оорулардын клиникалык ооруканасында көзөмөлдө болуп жатат. Бул тууралуу бүгүн, 5-февралда Жалал-Абад облусунда коронавирусту алдын алуу боюнча өткөн жыйында белгилүү болду.

Тогуз-Торо районунун акиминин орун басары Гүлжамал Султангазиеванын айтымында, кытай жарандары 31-январь күнү «Макмал Голд Компани» компаниясына иштегени келишкен. Бирок ошол эле күнү борбор калаага жөнөтүлгөн.

«Коронавирус оорусун алдын алуу үчүн райондук мамлекеттик администрациясынын алдында атайын штаб түзүлгөн. Аны аким жетектеп жатат. Кытайдын 10 жараны облуска келе жатканы боюнча маалыматты угуп, дароо штабдын отуруму өткөрүлдү. Аким «Макмал Голд Компанинин» өкүлдөрү менен байланышты. Алар кызматкерлерин ооруканага жаткыруу үчүн Бишкекке алып кетишти. Келген жарандар аталган компаниянын подрядчылары экен», - деди Г. Султангазиева.

Жыйында Чаткал районунун акими Канжар Эшалиев коронавирус эпидемиясына район эли да кооптонуп, кен казуучу компанияга Кытайдан келүүчү жарандар боюнча кабатыр болуп жатышканын жана райондо жугуштуу оорулар менен иштеген адистин жоктугу мындай абалда кооптуулукту жаратарын айтты. Ал эми өкмөттүн облустагы өкүлү сырттан келген кытай жарандарынын ар бири текшерүүдөн өтүп жатканын билдирди.

«20 күн көзөмөлгө алынып, андан кийин аймактарга жөнөтүлүүдө. 10 жаран Бишкекте текшерүү пункттарынан өтүп, Тогуз-Торо районундагы «Макмал алтын» комбинатына келишкен. Бирок өздөрүнүн жетекчилиги унаадан түшүрбөй, кайра алып кетишти. Азыр алар дарыгерлердин көзөмөлүндө, алдын алуу үчүн жасалган кадам. Өлкө аймагында иштеп жаткан кытай жарандары биздей эле. Кытай десе эле ичинде вирус жашайт экен деп ойлобошубуз керек. Баарыбыз элге туура түшүндүрүү ишин колго алалы», - деди Н.Мирзахмедов.

Жыйын тууралуу толук маалымат бул шилтемеде.

«Макмал Голд Компани» ЖЧКсы 2019-жылы 7-майда кайра каттоодон өткөн. Компаниянын жетекчиси катары Сю Лин катталган. Ал эми негиздөөчүлөрү болуп «Кыргыз алтын» ААК (30%) жана «Mancon Group» («Мансон Групп») (70%) ЖЧКсы саналат.

«Мансон Групп» 2019-жылы 20-декабрда кайра каттоодон өткөн. Анын жетекчиси — Сю Лин. Негиздөөчүлөрү катары Туманов Алмазбек Жаныбаевич, Янг Венхуй жана Сю Лин көрсөтүлгөн. Негизги ишмердүүлүгү — баалуу металлдарды казуу жана иштетүү.

А.Туманов — «Алашан-Транс» ЖЧКнын негиздөөчүсү. Компаниянын негизги ишмердүүлүгү — жүк ташуучу унаалар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×