Бөлүмдөр
Дүйшөмбү, 17-февраль
Жалал-Абад облусуЖалал-Абад 21.01.2020 11:42 На русском

Жол эрежесин бузган судьянын иши: Сотко ишенбөөчүлүк көрсөтүлдү

Turmush -  Жалал-Абад шаардык сотунун судьясы Э.Сулайманованын 2019-жылдын 29-декабрында тартип бузуу кодексине ылайык айып салынган токтомдорун жокко чыгаруу боюнча даттануусун шаардык сот карады.

Анда жол көзөмөлдөөчүлөр шаардык соттун курамына ишенбөөчүлүк келтиришти. Бирок инспектордун өтүнүчүн отурумга төрагалык кылуучу судья канааттандырган жок. Бул тууралуу аймактык кабарчы билдирди.

Маалым болгондой, 2019-жылдын 30-декабрына караган түнү унаа башкарып бара жатып, жол кырсыкка кабылган судья ага карата толтурулган протоколду жоюу боюнча шаардык сотко кайрылган. Муну кечээ, 20-январда шаардык соттун судьясы М.Сариев карап, отурум ачык өттү.

Отурумда сотко чакырылган жол көзөмөлдөөчүлөр бул иш боюнча шаардык сотко ишенбей жатышканын айтышып, башка район-шаарга өткөрүп берүү өтүнүчүн келтирди.

Жалал-Абад ОИИБдин ЖККК бөлүмүнүн өкүлү Тыныч Рахманов судьяга ишенбей турган жагдайларын түшүндүрүп жатып: «Элмира Сулайманова бир нече жылдан бери шаардык сотто судья болуп иштеп келе жатат. Учурунда ал Жалал-Абад шаардык соттун төрайымы болгон, сиз анын кол алдында иштегенсиз. Мамилеңиз жакшы деп ойлойм. Бир эле сиз эмес, башкалар менен мамилеси жакшы. Ошондуктан Жалал-Абад шаардык сотунун курамына ишенбөөчүлүк келтиребиз», - деди.

Ал эми судья Элмира Сулайманованын жактоочусу ишенбөөчүлүк келтирүү негизсиз жана мыйзамсыз экенин айтты.

«Биринчиден, түшкөн материал 14 күндүн ичинде каралышы керек. Экинчиден, протокол соттук териштирүү болгонго чейин сотко кайрылган катты алып кетишсе болмок, атайын создуктуруу аракетин көрүп жатышат. Ал эми сот кызматын аткарууда мыйзам негизинде ишти калыс карайт деп ишенем. Ишенбөөчүлүккө негиз болгон жагдайларды көрсөтүү керек эле, эч кандай жүйө келтире алышкан жок. Ошондуктан ишенбөөчүлүк келтирүүнү канааттандыруусуз калтырууну суранам», - деди ал.

Отурумда жол көзөмөлдөөчүлөр тарабынан жактоочу алууга мыйзам жол берилбей турганын судьянын жактоочусу баш мыйзамдагы беренелерди көрсөттү. Тыныгуудан соң протокол толтурган инспектордун ишенбөөчүлүк келтирүү сунушу канааттандыруусуз калтырды.

Соттук иш уланмай болду. Сот отурумда жол көзөмөлдөөчүлөр судьянын жазган арызы менен кабарсыз экенин, арыз менен таанышып чыгуу керектигин айтышып, сот отурумун башка күнгө жылдырууну суранышты. Жыйынтыгында судьяга байланышкан сот отуруму 22-январга саат 10:00гө жылдырылды.

Буга чейин «Баракелде» басылмасы Жалал-Абад облусунда судьянын катышуусунда жол кырсык болгонун жазган.

«Жол кырсык 30-декабрда түндө болгон. Протокол толтурулуп, автоунаа айып короого киргизилди», - деп айтылат расмий билдирүүдө.

Окуя учурунда тартылган видео «НурТВ» телеканалынын «Рейд» телеберүүсүндө көрсөтүлгөн. Видеодон Жалал-Абаддагы көчөлөрдүн биринде «Тойота» унаасы «Дэу Нексия» менен кагышканын көрүүгө болот. «Тойота» унаасын башкарып жүргөн аял киши документтерин көрсөткөн эмес. Ал суроолорго жооп берип жатып шаардык сотто судья экенин жана майрамдык кечеден кайтып бара жатканын айткан. Мас абалда экенине шек жаралгандыктан милиция кызматкерлери аны наркология бөлүмүнө экспертизага алып барышкан.

Кийинчерээк унаанын рулун Жалал-Абад шаардык соттун судьясы Элмира Сулайманова башкарганы такталган.

5:50-мүнөттөн баштап көрүңүз:

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×