Бөлүмдөр
Шаршемби, 16-октябрь
Жалал-Абад облусу, Жалал-Абад 04.10.2019 16:46 На русском

Жалал-Абадда мыйзамсыз курулган май куюучу жайлар боюнча сотко арызданышты

Turmush -  Жалал-Абад облусунда көп кабаттуу жана турак үйлөргө жакын жайгашкан май куюучу жайлардын ишин мыйзамсыз деп таап берүү боюнча Экологиялык жана техникалык коопсуздук боюнча мамлекеттик инспекциясынын Сузак району жана Жалал-Абад шаары боюнча аймактык башкармалыгы сотко кайрылды. Бул тууралуу аймактык кабарчы билдирди.

Маалыматка караганда, Жалал-Абад шаарында жана Сузак районунда жалпы 42 май куюучу жай бар. Анын ичинен май куюучу жайлар турак үйлөрдөн, объектерден 50 метр алыс жайгашуусу керек деген талаптар сакталган эмес.

«Өрт коопсуздук эрежесине ылайык май куюучу жайлар турак үйлөрдөн, имараттардан 50 метр алыс жайгашуусу керек. 10 май куюучу жайда ошол аралык сакталган эмес. Май куюучу жайдын ээси менен ага жакын жайгашкан имараттын ээси бир болсо, аралык бир аз кыскарат. Ошол үчүн ал жайлардын жанында жайгашкан үйлөрдүн, имараттардын документтерин оозеки түрдө сурап көрдүк. Азыр ишкерлерди текшерүүгү мораторий киргизилген. Тиешелүү документтер колго тийсе мыйзамдуулугу же мыйзамсыздыгы белгилүү болмок. Ал эми Жалал-Абад шаарында Жазаларды аткаруу мамлекеттик кызматынын кызматкерлери үчүн салынган көп кабаттуу үйдүн жанында курулган май куюучу жайды мыйзамсыз деп таап, буздуруу үчүн сотко кайрылышкан.

Андан сырткары Сузак районунун Комсомол айылында турак үйлөргө жакын жайгашкан жай боюнча дагы сотко материал даярдалып жатат. Өтө жакын 3 үй бар экен, экөөсүнөн документтер алынды, бири чет өлкөдө жүргөндүктөн күтүп жатабыз. Сузакта турак үйлөргө жакын жердеги май куюучу жайдын курулушунун мыйзамдуулугун карап берүү жана иштөөгө уруксат берген тийиштүү мекеме жетекчилердин жоопкерчиликтерин карап берүү үчүн райондук прокуратурага кайрылдык. Ушундай эле багытта дагы бир жай боюнча мыйзамды көзөмөлдөөчүлөргө кайрылабыз», - дешти аталган мекемеден.

Маалым болгондой, шаарда жана райондо элди күйүүчү май менен камсыздаган жайлардын ичинен талаптарга жооп бербегендерине 275 миң сом айып пул салынды.

Жалал-Абад облусунда 90 май куюучу жай, 10 газ куюучу жай, 6 мунай база, мунай өндүрүүчү 4 завод бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×