Бөлүмдөр
Шаршемби, 16-октябрь
Жалал-Абад облусу, Жалал-Абад 30.09.2019 18:10 Жаңыланды: 30.09.2019 19:18 На русском

Жалал-Абадда мэрдин кабылдамасынан чиновниктин телефону уурдалды. Окуянын чоо-жайы

Жалал-Абад шаарынын мэриясы
Жалал-Абад шаарынын мэриясы

Turmush -  «Жалал-Абад суу канал» ишканасынын башчысы Төлөнбек Бакиров мэрдин кабылдамасында уюлдук телефону жоголгонун билдирип, милицияга кайрылды. Окуянын чоо-жайын аймактык кабарчы териштирди.

Былтыркы жылдын июль айынан бери «Жалал-Абад суу канал» ишканасын жетектеп келген Төлөн Бакировдун айтымында, ал 24-сентябрь күнү адаттагыдай чогулушка барган. Башка мекемелердин жетекчилери сыяктуу телефонун мэрдин кабылдамасына таштап кирген.

«Биринчи күнү аппараттык жыйынга баргам. Андан кийин кайра коммуналдык кызматтардын жетекчилери болуп саат 10:30да мэрге киргенбиз. Баарыбыз уюлдук телефондорубузду мэрдин кабылдамасына таштаганбыз. Кайра саат 11:30да чыгып, уюлдук телефонумду алуу үчүн келсем 4 телефон калыптыр, меники жок. Кабылдамадагы кыз: "Ооба, телефонуңузду таштагансыз, таппай жатам" деди. Ал күнү тамашалап жатышабы деп көпкө күттүм, бирок дайыны чыккан жок. Милицияны чакыртып, видеокамераны карадык. Бирок ошол күнкүсү жазылбай калыптыр. Санитардык кызматкер өчүрүп салыптыр дешти. 25-сентябрда ШИИБге арыз жаздым», - деди Т.Бакиров.

Жалал-Абад ОИИБдин басма сөз кызматынан алынган маалыматка караганда, мэрияда болгон окуя боюнча териштирүү иши жүрүп жатат.

«Мекеменин жетекчиси бизге 25-сентябрда арыз менен кайрылып, 29 миң сомдук телефону уурдалганын билдирген. Арыздын негизинде бул факт Кылмыштардын жана жоруктардын бирдиктүү реестрине уурулук катары катталып, өндүрүш иши ачылган. Учурда тергөө амалдары жүрүп жатат», - деп маалымдашты.

Мэриянын алдындагы маалымат борборунан окуяны укук коргоо органдары териштирип жатканын билдиришти.

«Телефондун жоголгону боюнча арыз жазылган. Учурда ишти шаардык ички иштер башкармалыгы карап жатат. Телефон жоголду деген бөлмөдө видео көзөмөл болгон эмес. Ал эми ошол күнү 10го чукул адам мэрге кеңешмеге кирген. Азырынча мэрия укук коргоо органдарынын жообун күтүп жатат.

Ал эми аппарат жетекчинин капчыгы уурдалган учур 3-кабатта жайгашкан видеокөзөмөлгө түшүп калган. Бул иш дагы милиция тарабынан иликтенип жатат», - деп билдиришти маалымат борборунан.

Бүгүн Жалал-Абад шаардык кеңештин депутаттары «Жалал-Абад суу канал» ишканасынын жетекчиси Төлөн Бакировдун ишине канааттанбай турушканын билдирип, ишенбөөчүлүк көрсөтүштү.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×