Бөлүмдөр
Шаршемби, 16-октябрь
Жалал-Абад облусу, Жалал-Абад 24.09.2019 12:57

Сүрөт — Жалал-Абадда эмгек мигранттар тигүү цех жана турак үй куруп жатышат

Turmush -  Жалал-Абад облусунда чет өлкөдөгү эмгек мигранттар жесир аялдарга жана балдар үйүнөн тарбиялып чыккан балдарга тигүүчү цех жана турак үй куруп жатышат. Бул тууралуу аймактык кабарчы билдирди.

Маалым болгондой, демилгени Орусияда эмгектенген мекендештер көтөрүп, каражат чогултушкан.

«Мындан 5 жыл мурун Россияда курулуш базарында сатуучу болуп эмгектенген мекендештер «Үмүт» аттуу фонд түптөгөнбүз. Фонд аз камсыз үй-бүлөлөрдүн балдарына кийим-кече жана балдар үйүндө тарбияланган балдарга материалдык жардам берүү максатында түптөлгөн. Ал жерге акчалай же болбосо кийим-кече, оюнчук жана ар кандай буюм-тайымдар жыйналып, аны Кыргызстанга жиберип, муктаж болгон балдарга таратчубуз.

Эми Жалал-Абад шаарынын Дача-Тилек конушунан 4 сотых жер тилкесин сатып алып, ал жерге чакан цех куруп жатабыз. Башында балдар үйүнөн тарбияланып чыккан балдар жашап, иштегенге ыңгайлуу кылып курууну пландаганбыз. Кийинчерээк планыбызга өзгөрүүлөр кирип, аталган цехте жесир аялдарга дагы жумуш табылат деген чечимге келдик. Учурда пайдубалын куюп бүттүк. Курулуш иштери эмгек мигранттардын колдоосу менен жүргүзүлүп жатат. Буюрса 2020-жылдын күз мезгилинде толук бүткөрүлүп, ишке киргизебиз деген планыбыз бар», - деди фонддун жетекчиси Дастан Сабирбеков.

Мындан сырткары, ал аталган фонд буга чейин Ош жана Талас облустарындагы балдар үйлөрүнө материалдык жардам көрсөтүп келгенин, Жалал-Абаддагы балдар үйлөрү дагы четте калбастыгын кошумчалады.

Буга чейин Майлуу-Суу шаарында эмгек мигранттар колунда жок үй-бүлөгө үй куруп жатканы маалымдалган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×