Бөлүмдөр
Шаршемби, 16-октябрь
Жалал-Абад облусу, Жалал-Абад 17.09.2019 15:25

Сүрөт — Кадыржан Батыровго тиешелүү бала бакча тонолуп, талкаланган

Turmush -  Кадыржан Батыровго тиешелүү деп улутташтырылган объекттердин катарындагы бала бакча талкаланып, тонолуп, кароосуз калган. Мындан улам бул жайды ижарага алган «Нур-Билим-Ордосу» ЖЧКсын сотко беришти. Бул тууралуу өкмөткө караштуу Мүлк фондунун алдындагы «Элдик» ишканасынын жетекчиси Алексей Апиев АКИпресс–Жалал-Абад маалымат борборунда өткөн жыйында билдирди.

Анын айтымында, аталган ЖЧКнын жетекчилиги мекеменин чарбалык башкаруусундагы мектептин жана бала бакчанын имаратын 10 жылдык мөөнөткө ижарага алышкан. Келишим түзүлгөнүнө карабастан бала бакчага карата белгиленген ижара акы төлөмүн 3 жылдан бери төлөбөй жатышат.

«Билим берүү жана илим министрлиги тарабынан тиешелүү лицензия берилбегендигине байланыштуу бир лот менен Жалал-Абад шаарындагы Некрасов көчөсүндөгү бала бакча жана Сузак районунун Пахта көчөсүндөгү мектеп 2016-жылдын март айында «Нур-Билим-Ордо» ЖЧКсына 10 жылдык мөөнөткө ижарага берилген.

Келишимге ылайык, мектептин имараты үчүн ар ай сайын төлөнүүчү ижара акысы 235 миң сом, бала бакчаныкы 105 миң сом болуп аныкталган. Мектептин ижарасын төлөп жатышат. 2017-жылдын 1-сентябрынан тарта бакчага болгон төлөмдү төлөөнү мыйзамсыз токтотуп койгон. Анын төлөнбөй калышына биздин мекемеде мурда жетекчинин орун басар болуп иштеп кеткен Нурлан Жумабаевдин таасири болгон. Анткени анын жубайы «Нур-Билим ордосу» ЖЧКсын ачып, ошол бакча менен мектепти алып, жеке менчик мектебин ачкан. Келишимди жубайлар түзгөн.

200 балага ылайыкташкан бала бакча алгач иштеп турган. Абалы да жакшы болгон. Алардын жоопкерчилигинде экенине карабастан талкаланып, тонолуп, кароосуз калган. Мен жетекчи болуп келгенден кийин бакчанын абалын көрүп, ушундай оор абалга келгени үчүн жооп беришерин айттым. Ижарачы кандай алса ошондой сакташы керек эле. ЖЧКга жаңыдан келген жетекчилик оңдоп бере турганын айтышканы менен толук жөнгө салышкан жок. Бакчаны алгыла деп башкаларга сунуштаганы мыйзамсыз», - деди ал.

Анын айтымында, ижарачы бакчаны талапка ылайык кармашы керектигин талап кыла баштаганда анын үстүнөн Жогорку Кеңештин депутаттарына түрдүү каттарды жөнөтүшүп, жөнү жок жамандоо аракетин көрүп жатышат. Ижара акыны төлөбөй жаткандыгы, бакчанын имаратын кароосуз калтырганы үчүн райондор аралык сотко кайрылышты. Бул иш азыр соттун кароосунда турат.

Некрасов көчөсүндөгү бала бакча кезегинде толуп, 200дөн ашуун бала тарбияланып келген. 2010-жылдан кийин да иштеп турган. Бакчадагы тарбиячылар түп тамырынан алмашып, бакчаны жөндөп иштетип кетүү колго алынбагандыктан жергиликтүүлөр балдарын берүүдөн баш тартып коюшкан. Бакчаны иштетүү аракеттери көрүлбөгөндүктөн эки кабаттуу имарат кулпуланып турат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×